LA UNION – Pakabuklan a 138,200 doses ti COVID 19 vaccines iti simmangpet iti Department of Health (DOH) Region One idi kalman, Hulyo 13, 2021.
Iti nasao a supply iti bakuna ket maibilang a kaadwan a simmangpet sipud nangrugi ti vaccination rollout ditoy Rehiyon Uno.
Daytoy met iti maika-15 a batch dagiti vaccine supply a simmangpet iti DOH Region 1, a pakairamanan iti 123, 200 nga AstraZeneca vaccines ken 15,000 a Gamaleya Sputnik V.
Manamnama nga iti mabiit ket maibunong dagiti nasao a bakuna kadagiti uppat a probinsiya ditoy rehiyon a pakaibilangan ti La Union.
Para iti probinsiya ti La Union, kalkalpas ti pannakaibunong iti 2,194 doses ti Covid 19 vaccines kadagiti 14 a vaccination sites.
Kabilang ditoy iti 510 a pfizer vaccines para 1st dose ken 1,684 a sinovac para 2nd dose.
Kabayatanna, naamwan pay manipud DOH Region One a pakabuklan metten a 374,398 nga indibiduwal iti nabakunaan ti first ken 2nd dose ti COVID vaccines.
Nu agtultuloy iti panagsangpet dagiti bakuna ditoy rehiyon ket posible, segun iti DOH, a nabiit a magun-od iti target a populasyon a mabakunaan tapno maaddaan ti makunkuna a herd immunity.
