BR LA UNION – Kinontra dagiti prosecutors ti International Criminal Court (ICC) iti kiddaw ti kampo ni sigud a Presidente Rodrigo Duterte nga i-diskwalipika ti 2 nga ukom manipud iti panagdesisyon iti isyu ti hurisdiksiyon ti tribunal iti kaso ti sigud a Presidente.
Immunan a kiniddaw ti lead counsel ni Duterte a ni Nicholas Kaufman idi Mayo 2 iti ICC nga i-diskwalipika da Pre-Trial Chamber I Judges Reine Adélaïde Sophie Alapini-Gansou ken María del Socorro Flores Liera manipud iti panag-desisyon seknan iti kuwes-kuwestiyunaran da a hurisdiksiyon ti korte iti kaso ti sigud a Presidente.
Impaganetget iti kampo ti sigud a Presidente a babaen iti panangdiskwalipika iti dua a judge ket maipagarop a maaywanan iti karbengan ni Duterte para iti “awan pab-paboran a pangngeddeng.”
Nupay kasta, iti nairuar a sungbat ti ICC prosecutors idi Mayo 22, pormal a kinedkedan ni deputy prosecutor Mame Mandiaye Niang, mangibagbagi iti Office of the Prosecutor, iti request ti kampo ni Duterte gaputa maipagarop a napaay iti defense team a mapaneknekan a nangipakita ti killo wenno bias iti dua a hurado.
Maisupadi iti posisyon ti defense team, saan pay a nadetermina dagiti judges iti outcome wenno saan pay a napagdeisyunan iti dispute seknan iti hurisdiksiyon a pabor iti biang ti prosekusyon.
Da Gansou ken Liera ket paset ti chamber a nag-otorisa iti ICC prosecutor a lukatan ti imbestigasyon iti war on drugs ni sigud a President Duterte idi 2021 ken itultuloy iti nasuspendi nga imbestigasyon idi 2023.
Iti agdama, agtaltalinaed a nakadetine iti sigud a Presidente idiay The Hague, Netherlands bayat a nakapenpen iti kumpirmasyon ti kaso a maiyak-akusar kenkuana a crimes against humanity seknan iti nadara a war on drugs a naituding inton Setyembre.
