Agtultuloy a maisaysayangkat ti Kadiwa sa Lungsod Week ita nga aldaw idiay Kubo nga abay ti Lions Park iti City Hall ditoy Ciudad ti San Fernando, La Union.
Iti pannakiuman ken ni Remedios Reyes, maysa kadagiti aglaklako iti nateng, imbinglayna a bassit pay laeng ti bilang dagiti aggatang gapu ta saan pay a napakaamwan unay iti publiko a maisaysayangkat ti Kadiwa iti daytoy a lugar.
Sigun kenkuana, no awan ti Kadiwa ket masarakan met laeng isuna nga aglaklako ti nateng idiay Public Market ti San Fernando.
Nangruna ta iti Kadiwa ket nababbaba ti presyo dagiti produkto, gapu ta diretso a naggapu kadagiti mannalon dagiti ilaklako a nateng ken sabali pay a produktoda.
Imbinglay met ni Reyes a nasayaat ti panaglako iti Kadiwa gapu ta kadawyan a saan a barat dagiti customers. Nupay kasta, inaklonna a nakaapekto ti ngato a presyo ti gasolina ken dagiti bayad iti panangangkat kadagiti nateng manipud iti talon agingga iti paglakuan.
Inawisna dagiti publiko a suportaran dagiti lokal a mannalon babaen iti panaggatang kadagiti produktoda tapno makatulong iti panangipaay ti bassit a birok da.
Innayonna pay a idi kalman ket adda ti birok na nga agarup 2,800 pesos, ngem kurang pay daytoy tapno mabawi ti puhunanna a 6,000 pesos. Namnamaenna a dumakkel pay ti bilang dagiti aggatang agingga iti panagserra ti Kadiwa sa Lungsod Week inton Biyernes. (Bombo Lorie Llavore)
