SAN FERNANDO CITY, LA UNION – Agtultuloy iti suporta ti City Government kadagiti mannalon ken mangngalap, babaen iti panangiyuswat ti programa a Kadiwa sa Lungsod.
Mangrugi daytoy inton Abril 13 agingga Abril 17, 2026, a mangiyeg kadagiti presko, nalaka a presyo, ken lokal a produkto iti komunidad.
Ti programa ket mangtulong iti panangipasdek ti direkta a panaglako manipud kadagiti mannalon ken mangngalap, agingga kadagiti consumer.
Kas paset daytoy, maipatungpal met ti Benteng Bigas inton Abril 15 ken 16, 2026, a agserbi iti umuna a sangaribo a benepisyaryo, babaen ti “first-come, first-served” a basaran.
Maangay daytoy idiay Lion’s Park, ken kalpasanna, maisagana iti kubo iti sirok ti acacia tree.
Dagiti mabalin a makagun-od ti Benteng Bigas ket dagiti senior citizens, solo parents, PWDs, indigent households a pakairamanan dagiti 4Ps beneficiaries, kasta met dagiti mannalon, farmworkers, fisherfolk, jeepney, tricycle drivers, ken minimum wage earners.
Masapul laeng a mangipakita ti umno nga ID wenno sertipikasyon manipud iti sektor tapno makagun-od iti 10 kilos a bigas tunggal panaggatang.
Palagip kadagiti amin a benepisyaryo a mangyeg iti bukod da nga eco-bags tapno makatulong iti panangbaba ti basura ken panangsalaknib iti aglawlaw.
Daytoy a inisyatibo ket maiyannurot iti City Ordinance No. 2024-13, a nangpabileg iti panangipatungpal ti Kadiwa program iti Ciudad ti San Fernando, La Union.
Iti agtultuloy a panagkaykaysa, maipakita ti panangsuporta iti lokal a produkto ken panangpasayaat iti biag dagiti mannalon ken mangngalap. (Report by Bombo Lorie)
Photo Courtesy: City Government of San Fernando, La Union
