LA UNION – Mapagsasaritaan ita dagiti residente ti pangganakan a kalding a nagipasngay iti lima anga urbon idiay Barangay Lisqueb, idiay ili ti Bacnotan, La Union.
Iti pannakiuman ti Bombo Radyo iti makinkukua ti nasao a kalding a ni John Paul Sobremonte, kinunana a saanna a ninamnama nga aganak iti lima nga ayop ti tarakenenna.
Masasansan kinunana, agipaspasngay ti maysa a pangganakan a kalding iti dua agingga iti tallo nga urbon laeng.
Gapu ta saan a mabalin nga aggigiddan a mapasuso iti pangganakan dagiti urbonna ket timtimplaan iti gatas ken paspasusoen laengen ni John dagitoy babaen ti mamador.
Maragragsakan met ni John gapu ta nagipasngay iti lima nga urbon ti pangganakan a kaldingna nga uppaten a daras a naganak. (Abs Flores)
