BR LA UNION – Nainget a kinondenar ti House of Representatives iti maipagarop a panagkedked ti Senado a mangtalantan iti P200 legislated wage hike.
Posible nga ingagara ti Senado a patayen iti nadakamat a gakat gapu ta saan a napagsasaritaan idi rabii ti naudi a sesyon dagitoy.
Iti maysa a waragawag, imbaga ni House of Representatives Spokesperson Atty. Princess Abante a nakasaganan iti House bicameral conferees a makipagkita ken makitunos iti nagduma a bersion ti nasao a gakat, ngem saan a simmungbat ti Senado.
Segun kenni Abante, nangiyebkas ti pannaka-dismaya iti House bicam conferees gaputa nakasagana da nga idepensa iti P200 legislated wage hike ken naammuanda nga awan ti panggep ti Senado a makitaripnong.
Dinamag ni Abante no apay a tag-tagibassiten ti Senado dagiti mangmangged.
Kinunana a kayat ngamin ti Senado a suroten ti Kamara iti P100 legislated wage hike version nga inaprobaranda.
Inlawlawag ni Abante a ti P200 legislated wage hike ti Kamara ket nainget a naadal ken saan a maibilang a reckless proposal.
