BR LA UNION – Nakasagana iti Kamara nga i-extend wenno paway-wayan iti “travel authority” ni Davao City Rep. Paolo Duterte nu kiddawen na daytoy.
Segun kenni House Secretary General Reginald Velasco, nu kayat ti kongresista nga agtalinaed pay laeng idiay The Netherlands ket karbenganna daytoy.
Immunan nga inaprubaran ti Kamara iti travel clearance ni Rep. Duterte, para iti biyahe na idiay The Netherlands ken Japan, manipud March 15 agingga April 15, 2025.
Daytoy ket kasaruno ti panangarestar ti ama na a ni sigud a Pres. Rodrigo Duterte ti International Criminal Court wenno ICC babaen ti Interpol.
Kinuna ni Velasco a mabalin a kiddawen ti kongresista wenno agsurat iti House leadership para iti extension ti travel authority wenno clearance.
Inlawlawag pay ni Velasco, nga awan pay ti sesyon iti Kongreso ken agsubli inton June 2, isunga adda pay gundaway dagiti kongresista nga agbakasyon wenno agkampanya para iti Eleksyon 2025.
Inlawlawag ni Velasco nga awan ti aramidenda a panagirut para kenni Rep. Duterte agsipudta iti biyahe na ker “pribado” idinto a ti papel ti Kamara ket “ministerial” wenno mangipapaay da laeng ti travel authority wenno clearance.
