BR LA UNION – Impaganetget ti kampo ni Senador Ronald “Bato” Dela Rosa a saan isuna a maysa a “fugitive from justice” wenno aglem-lemmeng a pugante, maisupadi iti waragawag ti Office of the Solicitor General (OSG) seknan iti arrest warrant nga inruar ti International Criminal Court (ICC).
Iti naisumite a 117-pinanid a sungbat iti Korte Suprema, imbaga dagiti abogado ni Dela Rosa nga agtaltalinaed isuna iti uneg ti pagilian, bigbigenna iti hurisdiksyon ti Supreme Court, ken maipagarop a saan nga aglem-lemmeng kadagiti otoridad ti Pilipinas.
Segun iti kampo ti senador, kuwestiyunaran da iti hurisdiksyon ti ICC ken legalidad ti implementasyon iti Pilipinas, kabilang iti arrest warrant kontra kenni Dela Rosa.
Gaputi dayta, imbaga da a saan a mabalin nga ibilang a pugante iti senador bayat a saan pay a naresolba iti isyu seknan ti bileg ti nasao a warrant.
Impaganetget pay ti legal team ni Dela Rosa nga awan ti agraraira a lokal wenno Philippine court-issued warrant kontra iti senador isunga awan ti maipagarop a legal obligation na tapno sumuko.
Immunan a kiniddaw ti OSG iti Korte Suprema nga ibasura iti petisyon ni Dela Rosa kontra ICC warrant gaputi maipagarop a kaawan ti merito.
Ngem segun iti OSG, maibilang a pugante iti maysa a tao a mangigag-gagara a manglisi iti panangipatungpal ti linteg, a kas iti panangliklik ni Dela Rosa a ma-aresto.
Maipalagip a pimmanaw ni Dela Rosa idiay Senado idi parbangon ti Mayo 14 kalpasan iti insidente ti pammaltog idiay Senado idi rabii ti Mayo 13.
