Inawat iti kampo ni sigud nga House Speaker Ferdinand Martin Romualdez iti panangaklon ti broadcaster a ni Ramon Tulfo a biddut iti inwaragawag na seknan iti maipagarop a palimed a panagruar ti sigud a lider ti Kamara idiay New Quezon City Jail.
Segun kenni Atty. Ade Fajardo, tagapagsarita ni Romualdez, inaklon ni Tulfo a biddut nga impormasyon iti naawat na manipud iti maysa a source ken saanna daytoy a napaneknekan sakbay a naipablaak.
Dinakamat pay ni Fajardo iti testimonya ni Jail Superintendent Pacion a pinaglibakanna iti alegasyon a rumrumwar iti pagbaludan ni Romualdez ken us-usarenna ti ambulansiya wenno dadduma pay a lugan para kadagiti saan nga awtorisado a biyahe.
Maipalagip nga inwaragawag ni Tulfo iti Facebook post na idi Nobyembre 3 a maipagarop a palimed a rumrumnwar ken agsubli iti pagbaludan ni Romualdez. Idi agangay, inaklon met laeng ti broadcaster a biddut iti impormasyon nga impablaak na ken inawaganna daytoy a parparbo.
Nagpatulod metten dagiti abogado ni Romualdez ti demand letter idi Nobyembre 4 a kumidkiddaw kenni Tulfo nga isardengen iti panangiwaras ti alegasyon, ikkaten wenno i-korehir iti post ken saanen nga uliten ti nasao a waragawag.
Nagballaag pay dagiti abogado na a possible iti legal nga addang nu saan daytoy a masurot.
Segun kenni Fajardo, ipak-pakita ti insidente iti kinapateg ti panangberipika ti impormasyon sakbay nga i-post.
Kinuna na pay nga agtaltalinaed a nakabalud ni Romualdez ken sumursurot kadagiti allagaden ti pasilidad ken awtoridad ti pagukuman.
