Kiniddaw ti kampo ni sigud a presidente Rodrigo Roa Duterte iti International Criminal Court (ICC) Pre-Trial Chamber nga ag-convene dan para ti urgent status conference sakbay iti Hulyo 25.
Daitoy ket tapno madakamat dagiti saan pay a naresolbar a saritaan sakbay iti naituding a confirmation hearing iti crimes against humanity na inton Setyembre 23.
Nakailanad iti naipubliko a kiddaw ti defense team, kinuna ti kampo nga adda pay dagiti sumagmamano nga isyu ti sigud a presidente a natantan ken nasken a masungbatan a dinagos.
Dakdakamaten ti defense team dagiti uppat nga isyu a saan pay a naaramidan a resolbaren ti Pre-trial Chamber I kasta met dagiti “items” a saan da pay nga iggem, nu ketdi ket nai-redact iti naisubmitir a dokumento.
Pakairamanan ditoy ti kiddaw ti sigud a presidente para ti interim release, diskwalipikasyon dagiti dua nga hukom gapo ti panagbalin da a bias to isyu ti hurisdiksiyon, ken panangkarit kadagiti kameng ti ICC nga itandudo ti hurisdiksiyon da iti kaso kalpasan iti panaglosolos ti Pilipinas iti Rome Statute.
Segun iti defense, makatulong iti status conference tapno mailasin ti pinaka-episyente a wagas a maituloy dagiti sumagmamano a saritaan a na-redact wenno saan a naisali.
Kiniddaw da pay iti international court a maisayangkat ti conference sakbay iti alas-5:30 ti malem, oras idiay The Netherlands inton Hulyo 25 sakbay iti naituding a summer recess ti tribunal. Kabayatanna, ag-resume metten iti ICC inton Agosto 19.
