BR LA UNION – Kinumpirma ni Atty. Michael Poa, tagapagsarita ti kampo ni Vice President Sara Duterte seknan iti impeachment, nga adda laeng ditoy Pilipinas iti Bise Presidente.
Maisupadi daytoy iti sumagmamano nga ispekulasyon nga adda iti ballasiw taaw ti bise presidente, partikular idiay Kuwait.
Segun kenni Poa, nakasarita na idi rabii iti opisyal tapno idanon dagiti impormasyon seknan iti napasamak idiay senado a panang-archive ti reklamo nga impeachment.
Ngem nagkedked iti abogado a mangibinglay ti dadduma pay nga impormasyon seknan kadagiti aktibidad ti bise-presidente, nangruna ket saan met a direkta a paset ti OVP.
Itay nabiit, naipadamag nga adda idiay Marinduque iti bise presidente tapno agibunong ti school bags para kadagiti agtutubo, ngem kalpasan daytoy ket saan pay a nakita iti anyaman a public events.
