Nainget a kinontra iti defence team ni Bise Presidente Sara Duterte iti panangaramat ti House prosecution panel iti balikas a “mastermind” ken “architect” iti agtultuloy nga impeachment trial idiay Senado.
Iti maika-18 nga aldaw ti panagusig, linapdan ti Defence Counsel a ni Atty. Kristine Ferrer iti panagdamag ni Prosecution Counsel Atty. Mae Divinagracia iti testigo a ni OVP Assistant Chief of Staff Lemuel Ortonio.
Kiddaw ti depensa nga ikkaten iti opisial a rekord dagiti nasao a balikas ken palagipan iti prosekusion a liklikan dagiti sarita a kas iti “scam” ken dadduma pay nga alegasion a mabalin a pakaigapuan ti pre-judgment wenno mind-conditioning.
Dagus nga inaprobaran ni Presiding Officer ken Senate President Francis “Chiz” Escudero iti mosyon. Binilinna ti prosekusion nga agusar ti ad-adda a maitutop ken maawat a sasao.
Kabayatanna, imbaga ti pannakangiwat ti depensa a ni Atty. Michael Poa nga adda bukod nga estratehia dagiti abogado, ngem namnamaenda nga agtalinaed a nasayaat ken maitutop dagiti statement kadagiti sumaruno a panagdingngeg.###
