Nakasagana ti kampo ni Bise Presidente Sara Duterte a mangtaming kadagiti alegasion kontra kenkuana iti agtultuloy nga impeachment trial kalpasan nga inaprobaran ti Senate impeachment court iti pannakaipaulog ti subpoena para kadagiti bank records, tax records, ken dokumentona manipud iti Anti-Money Laundering Council (AMLC).
Binilin ti korte dagiti banko, Bureau of Internal Revenue (BIR), ken AMLC nga isubmitir dagiti makidkiddaw a rekord inton Hulio 30.
Segun kenni Atty. Michael Poa, pannakangiwat ti defense team ti Bise Presidente, saanda a bumusbusor iti panagbirok ti kinapudno ngem kayatda a siguraduen nga amin nga addang ket maitunos iti Konstitusion, agdama a linteg, ken pagannurotan ti impeachment court.
Kinunana, namnamaenda pay a mabalin a palubosan ti korte iti pannakaala dagiti dokumento ken nakasagana da a mangsupring iti alegasion nga unexplained wealth Duterte.
Saklawen dagiti subpoena dagiti peso-denominated bank records, sumagmamano a tax records, ken dagiti dokumento ti AMLC nga ibilang ti impeachment court a mainaig iti maikadua nga artikulo ti impeachment.
Inlawlawag met ti korte a dagitoy a dokumento ket mausar laeng kas pagasaran iti panangtingiting kadagiti alegasion ken saan nga automatiko a kayatna a sawen a maawat dagitoy kas ebidensia wenno mangpaneknek iti sungsungbatan.
Temporario a naisardeng ti hearing ti impeachment trial gapu iti panagsagana para iti State of the Nation Address (SONA) ni Presidente Ferdinand Marcos Jr.
Sumangsango ni Duterte kadagiti reklamo a culpable violation of the Constitution, graft and corruption, bribery, betrayal of public trust, ken dadduma pay a mainaig nga alegasion, nga agtultuloy nga iliblibak ti kampona.###
