BR LA UNION – Imbaga ti kampo ni Vice President Sara Duterte nga ag-monitor da laeng iti plenary deliberations ti Kamara de Representantes ita nga aldaw ti Lunes, bayat a nakatuding a pagbobotosan dagiti mammanday linteg ti impeachment case kontra iti bise presidente.
Segun kenni Atty. Michael Poa, tagapagsarita ti legal defense team ni VP Sara, saan da a pisikal a dumar-ay iti plenaryo ngem padaanan da ti agbalin a resulta ti binnotosan.
Kinuna na pay a saan da a mangipaay ti ispekulasyon nu magun-od iti kasapolan a 1/3 boto wenno 106 botos manipud iti 318 a miyembro ti Kamara tapno maipasa ti Articles of Impeachment idiay Senado.
Ti impeachment complaint ket nakabase iti nagtipon a reklamo nga indatag da Fr. Joel Saballa ken Atty. Nathaniel Cabrera.
Kabilang dagiti alegasyon ket ti culpable violation of the Constitution, bribery, graft and corruption, betrayal of public trust, ken dadduma pay a nadadagsen nga akusasyon.
Siniguro iti kampo ni Sara Duterte a nakasagana a sumango iti impeachment trial ikaso a maipatulod idiay Senado.
Kabayatanna, imbaga ni Senate President Pro Tempore Panfilo Lacson a pagkedkedanna ti anyaman a gandat a lapdan ti panag-convene ti Senado kas impeachment court nu maawat da ti Articles of Impeachment.
