LA UNION – Kanayunan a 99 units ti pangpasada a jeep iti palubosan ti Land Transportation Franchising and Regulatory Board Region 1 nga agpasada iti naduma-duma a ruta ditoy probinsiya ti La Union.
Base daytoy iti datos a nakalap ti Bombo Radyo manipud iti LTFRB Region 1.
Gaputi dayta, mangrugi ti nasao nga opisina nga agawat kadagiti ag-apply para iti special permit tapno makabiyahe dagitoy, inton September 28 agingga September 30,2020 manipud alas 8:00 ti agsapa agingga alas 5:00 ti malem, Lunes agingga Miyerkoles.
Maiyannurot daytoy iti Regional Memorandum Circular Number 2020-01-0011.
Nairanta ti addang tapno mapatgan ti pagkasapulan dagiti commuters iti pampubliko a transportasyon nangruna dagiti mangmangged ken iti kadawatan metten dagiti drivers ken operators a nayunan dagiti pampubliko a jeep.
Nupay kasta, amin a transaction ken panagsumite iti requirements ket maipatulod via online.
