LA UNION – Inaklon ni Cadaclan, San Fernando City Punong Barangay Samuel Jucar nga addu iti naawat a pammabalaw iti “Kap 47” manipud kadagiti netizens gapu iti panangidatagda iti kaso kontra kenni dismissed Mayor Dong Gualberto.
Ti “Kap 47” ket grupo a bukbuklen iti 47 a punong barangay iti syudad a nangidatag iti agtutuon a reklamo kontra kenni Gualberto gapu iti kontrobersyal a rehabilitasyon ti city plaza.
Iti pannakiuman kenni Punong Barangay Jucar, kinunana nga adu dagiti negatibo nga ibagbaga iti tattao kadakuada kas ti panangbirngas iti “bobo kaps”, “nabayadan” ken dadduma pay.
Aminado met ti kapitan nga uray ti pamilyana ket apektado met gapu iti nasao nga isyu.
Ngem takderan ti “Kap 47” sigun kenni Jucar iti inaramidda a panangidatag ti reklamo kontra iti inaramid ni Gualberto gapu ta ti laeng kinapudno iti inlabanda para iti pagsayaatan ti syudad.
Kinarit pay ti kapitan dagiti trolls iti social media nga ipakita iti kinataoda tapno makadepensa wenno makasungbat met dagitoy kadagiti alegasyon a maibarbarsak iti “Kap 47”.
Kabayatanna, namnamaen met ni Jucar a babaen iti pangidaulo ti agdama a Mayor Alf Ortega a maisubli iti good governance ken agbalin a patas ti trato daytoy kadagiti amin a barangay.
