LA UNION – Naidatagen iti piskalya ti kaso kontra iti maipagarup a karelasyon ti misis a maysa kadagiti lima a suspek iti panagtakaw ken panangpatay iti asawana a seaman idiay ili ti San Juan, La Union.
Iti pannakiuman ti Bombo Radyo kenni S/Ins. Juanito Buaron Jr., hepe ti San Juan Police Station, iti panangaklon ti 25-anyos a ni Manilyn Ursua iti imbestigador nga addaan daytoy ti maiparit a relasyon ti 36-anyos a suspek a ni Rogelio Velasco ti nagbalin a lead tapno marisot ti nasao a kaso.
Inaklo met ti misis a sumagmamano metten a lawas a masikog daytoy sakbay a simangpet idiay balayda ti asawana a ni Edgar Ursua a naggapu manipud idiay Singapore.
Natiliw ti suspek idi a libasanna ti police checkpoint kasaruno iti pannakaduktal manipud iti salwadna ti maysa a bala ti shotgun.
Sigun kenni Buaron, mabalin nga adda ti pakainaigan ti suspek iti panangpapatay ti biktima gapu ta maysa a shotgun ti naaramat iti krimen ken adda ti sumagmamano a sirkumstansya nga ikunkosiderada iti kaso.
Kaso a robbery with homicide ti naidatag iti pulisya ti Office of the Provincial Prosecutor kontra iti maipagarup a karelasyon ti nasao a misis.
Immuna iti daytoy, dead on the spot ti nadakamat a seaman kalpasan a paltugan daytoy dagiti suspek ket natakawan pay iti mapatta-patta a P100,000 a kwarta manipud iti balayda idiay Barangay Duplas ti nasao nga ili idi rabii ti August 12, 2017.
