LA UNION – Imbasura ti korte ti kaso a panaglabsing iti R.A. 10591 wenno Comprehensive Firearms and Ammunition Regulation Act a naidatag kontra kenni Marcus Corpuz ti Barangay Paringao, Bauang, La Union.
Daytoy ket kalpasan a mapaneknekan iti korte, a lisensiyado dagiti tallo a paltog a kinumpiskar dagiti pulis manipud iti balay ni Corpuz.
Imprenisinta ni Marcus babaen ti bukodna nga abogado iti amin a dokumento a mangpaneknek legal ken lisensiyado dagiti paltogna.
Kalpasan a paboran ti korte ken nangidatag ni Marcus iti motion to quash ken motion to dismiss.
Gapu iti pannakaibasura ti kaso, naisubli ti P100,000 a nagpiyansa ni Corpuz.
Maipalagip a nangisayangkat ti search operation dagiti kameng ti Bauang Police Station iti balay ti suspek babaen ti bileg ti search warrant nga inyatnag ni Judge Romeo Atillo Jr. ti RTC Br 31 idiay Agoo, La Union gapu ti maipagarup a panaglabsingna ti R.A. 10591
Immuna a dimmipensa ni Marcus a rehistrado ken lisensiyado dagiti paltogna babaen ti panangiparang kadagiti dokumento, ngem saan a namati ti raiding team.
