LA UNION – Bimmaba iti kaso ti sakit a dengue ditoy probinsiya ti La Union ita a tawen 2020 nu ikumpara idi 2019.
Base iti datus manipud Provincial Health Office (PHO), bimmaba iti aganay 83.6% ti kaso iti dengue ditoy probinsiya, nga iti agdama ket adda laeng ti 205 a kaso manipud idi bulan ti Enero agingga ita a bulan ti Setyembre.
Dagiti agtutubo nga agtawen ti 15 agingga 19-anyos iti kaadwan a nakaptan iti sakit a dengue a dumanon iti 51 ken ad-adu iti lallaki kumpara dagiti babbai.
Idiay met ili ti Aringay ken ditoy San Fernando City iti nakailista ti kaadwan a kaso iti dengue.
Palagip dagiti maseknan nga opisyal kadagiti residente iti kanayon a panangsurot iti 4’s kontra dengue pakairamanan iti search and destroy, seek early consultation, self protection ken support fogging ken dadduma pay nga interventions, a makatulong tapno matay dagiti lamok a mangipapaay iti sakit a dengue.
