Nagpirma iti maysa a Memorandum of Agreement wenno katulagan ti Department of Health – Ilocos Region, Ilocos Training and Regional Medical Center, ken iti maysa a mall ti Barangay Sevilla, siyudad ti San Fernando, La Union para iti pannakaipasdek ti maysa a Health Wellness Clinic iti uneg ti pasdek.
Naisayangkat ti Memorandum of Agreement Signing and Turnover Ceremony idi kalman, Pebrero 12, 2026.
Ti kangrunaan a tarigagay ti nasao nga addang ket tapno iyasideg ti serbisyo medikal para kadagiti umili, mapapigsa ti preventive care, ken nasap-sapa a pannaka-duktal ti kondisyon, babaen iti mas accessible ken kampante a lugar.
Kas paset ti katulagan, mangipaay ti mall iti rent-free space iti maikatlo a kadsaaran, inaldaw a silulukat ti klinika, manipud alas 10:00 AM agingga alas 6:00 ti sardam.
Ti nasao nga addang ket mangipakita ti panangi-pangruna iti Universal Health Care, babaen iti panangipaay dagiti serbisyo medikal kadagiti tattao.
