Nakasagana nga agtestigo ti self-confessed drug lord a ni Kerwin Espinosa sadiay International Criminal Court (ICC), The Hague, Netherlands mainaig iti war on drugs ni sigud a Presidente Rodrigo Roa Duterte.
Iti mays a pannakiuman kenni Espinosa kalpasan iti failed assassination kenkuana, agtestigo isuna tapno magun-od iti hustisiya para ti ama na a ni sigud nga Albuera Mayor Rolando Espinosa Senior a napatay met kabayatan ti war on drugs idi tawen 2016.
Imbatad pay ni Espinosa a maasyan isuna ti sigud a Presidente a nakadetene ita sadiay The Hague gapo ta lakay daitoyen.
Nupay kasta, impaganetget na nga adda ti linteg a rumbeng a suruten ken nasken a sangwen na ti kaso a naipila kontra kenkuana.
Nagsagaba ti tama iti abaga ni Kerwin kalpasan a mapaltogan isuna idiay Barangay Tinag-an kabayatan iti panagkampanya. Nasugatan pay iti pammaltog iti running mate ken kabsat na a ni Mariel Espinosa Marinay ken ti anak a babae a menor de edad ti maysa pay a kandidato.
Adda ita ti kustodiya dagiti otoridad dagiti pito nga pulis manipud Ormoc City a maibilang met kas persons of interest iti pammaltog kenni Espinosa.
Maipalagip a ni Kerwin Espinosa ket naarestar idiay Abu Dhabi idi tawen 2017 kalpasan a naglibas ditoy Pilipinas kasaruno ti pannakatay iti ama na. Napilaan isuna ti nagtutuon nga kaso nga adda pakainaigan na ti ilegal a droga ngem kamaudiananna ket imbasura metlaeng ti nagduduma nga Regional Trial Courts gapo iti kaawan ti umdas nga ebidensya.
