Inbasura ti Korte Suprema iti kiddaw ti kampo ni Senador Ronald “Bato” Dela Rosa a mangipaulog ti temporary restraining order kontra iti pannakaipatungpal ti warrant of arrest ti International Criminal Court (ICC).
Babaen ti botos a siam a pabor, 5 a kimmontra ken maysa a nag-abstain, inbasura ti Korte Suprema En Banc iti petision para iti TRO ken status quo ante order nga inpila ti kampo ti senador.
Kiniddawda a saan nga ipatungpal ti Department of Interior and Local Government (DILG), Department of Foreign Affairs (DFA), Department of Justice (DOJ), Philippine National Police (PNP), National Bureau of Investigation (NBI), Bureau of Immigration (BI), Armed Forces of the Philippines (AFP), ken Criminal Investigation and Detection Group (CIDG) iti panangipatungpal ti warrant manipud iti ICC.
Inlawlawag ti Supreme Court nga iti laeng petisyon para iti TRO iti dinesisyonanda ken saan pay a karaman dagiti dadduma a mosyon iti kaso.
Naipila idi napalabas a tawen iti petision tapno ikuestion iti hurisdiksion ti ICC ditoy Pilipinas ken pannakitinnulong ti gobierno.###
