Naan-anay nga imbasura ti Senado iti pormal a kiddaw ni Senador Ronald Bato dela Rosa a buleden ti Senate Mansion idiay Siudad ti Baguio para iti pamiliana kalpasan a pinasingkedan ti liderato a madama pay laeng iti pannakapatarimaanna.
Maibasar iti nagwaras a surat a napetsaan ti Marso 12, kiniddaw ti senador kenni Senate President Vicente Tito Sotto III nga usaren iti pasilidad manipud Marso 26 agingga 29.
Daytoy ket tapno agbalin kuma a pagtalinaedan ti pamilian kabayatan ti CSAFP Cup 2026 Shooting Competition iti firing range ti Philippine Military Academy (PMA).
Pormal a pinasingkedan ni Senate Secretary Mark Llandro Dong Mendoza a saan a napagbigyan iti nadakamat a kiddaw ni dela Rosa gapu ta saan pay a nalpas iti pannakatarimaan ti mansion.
Immunan a nagkedked ni Sotto a mangpasingked wenno mangilibak iti pannakaiwaras ti nadakamat a surat iti publiko.
Impaganetget ti Senate President a daytoy ket maysa a privileged communication isu nga impaimana iti panangilawlawag iti Senate Secretariat.
Iti laksid ti isyu iti pasilidad, impanamnama ni Sotto nga agtultuloy iti pannakipaset ni dela Rosa iti trabaho ti upper house.
Pammaneknek iti daytoy ti panagpirma ti senador iti Senate Resolution 343, a mangparparegta iti administrasion a mangipaulog dagiti contingency plans kas sungbat iti agdama a krisis iti presio ti lana.
Maipalagip a saanen a pisikal nga agrepreport ni dela Rosa iti Senado sipud idi Nobiembre 11, 2025.
Nagtaud iti napaut a kaawanna kadagiti report mainaig iti maipagarup a naipaulog nga warrant of arrest kontra kenkuana ti International Criminal Court (ICC).###
