Nangidiaya ti North Korean Supreme Leader Kim Jong Un ti sibubukel a suporta kenni Russian President Vladimir Putin para ti agtultuloy a gyera da kontra Ukraine.
Ti waragawag ni Un ket kabayatan ti panagpatang da kenni Russian Foreign Minister Sergei Lavrov, kas impadamag ti state media ti Pyongyang ita a Dominggo.
Daitoy a panagbisita ni Lavrov idiay North Korea ket paset ti serye ti panagbisita dagiti nangangato nga opisyales manipud Moscow a manamnama a mangpapigsa ti relasyon dagiti pagilian kontra ti opensiba ti Ukraine idiay Russia.
Kinuna ni Kim a nakasagana iti Pyongyang a mangsuporta kadagiti addang nga isayangkat ti gobierno ti Russia mainaig ti panangrisut ti krisis idiay Ukraine. Agtalek ti presidente ti North Korea nga agballigi dagiti soldado a Ruso iti panggep da a salakniban ti dignidad ti pagilian da.
Kalpasan ti panagtaripnong ket pinadayawan ni Lavrov ni Kim ken inyunay-unay ti bilateral talks, pakairamanan ti katulagan manipud summit ti North Korea ken Russia idi Hunyo 2024.
Kadagiti naglabas a lawas ket inyanunsyo ti Russia a dua a daras da a bisitaen ti Pyongyang kas panangpapigsa ti koneksyon.
Kabayatanna, dinakamat pay ni Lavrov ken ti North Korean counterpart na a ni Choe Son Hui, dagiti maiyannatop nga addang iti alyansa ti pagilian da nga inladawan na kas “invincible alliance”.
