LA UNION – Iti kinarigat ti panagbiag isunga adda iti sumagmamano nga umili nga ilegal nga agilak-lako ti kidney da wenno bato.
Segun kenni National Kidney and Transplant Institute (NKTI) Executive Director Rose Marie Rosette-Liquete, nasken a bantayan ti gobyerno iti nasao nga isyu, tapno naan-anay a maisardeng iti iligal nga aktibidad.
Maipalagip nga insango idi kalman ti National Bureau of Investigation (NBI) dagiti tallo a suspek a karaman iti maipagarop nga organ trafficking wenno agilaklako ti bato wenno kidney idiay San Jose del Monte, Bulacan.
Segun kenni NBI Director Jaime Santiago, adda naala a donor dagiti suspek nga isuda Angela Atayde, Marichu Lomibao ken Dannel Sicat ngem saan da a binayadan ti biktima, isunga nag-report iti opisina ti National Bureau of Investigation.
Ballaygi met a natiliw dagiti suspek idi July 11 manipud iti ab-abangan da a balay idiay San Jose Del Monte Bulacan, babaen iti insayangkat a raid ti ahensiya.
Adda pay naisalbar da a siyam a tattao. Kadagitoy a siyam, naalan ti kidney dagiti uppat idinto a dagiti lima ket maisag-sagana para iti operasyon.
Maibasar iti imbestigasyon ti NBI, maar-aramid ti transaksyon iti social media kasukat ti bayad a P200,000 ken isay-sayangkat da ti ilegal nga operasyon iti adayu a lugar.
Dagiti suspek ket naidatagan ti kaso a panaglabsing iti section 4 ti Expanded Anti Human Trafficking Act.
