Kinuwestiyon ti kampo ni Senador Ronald “Bato” dela Rosa ti legalidad ti ₱50-milion a gunggona ti gobierno para iti impormasion a mangiturong iti pannakaaresto ti senador.
Iti statement idi kalman Biernes, Oktubre 23, kiniddaw dagiti abogadona manipud iti Torreon & Partners nga ilasin dagiti otoridad ti lokal a korte a nangipaulog iti arrest warrant kontra iti senador ken iruarda ti memorandum ti Department of the Interior and Local Government (DILG) a mangiautorisar iti nasao a gunggona.
Segun kadagiti abogado, ICC arrest warrant laeng ti iggem ti gobierno ken awan ti local warrant kontra kenni Dela Rosa.
Immunan nga inwaragawag ni Interior Secretary Jonvic Remulla ti gunggona ken kinunana a maibilang nga armado ken napeggad ti senador a mapapati nga agtaltalinaed sadiay Mindanao.
Saanen a nagpakita ni Dela Rosa iti publiko manipud idi Mayo, kalpasan a nagtalinaed iti Senado kasaruno ti gandat a panangarestar kenkuana.
Ti ICC warrant ket mainaig iti alegasion ti crimes against humanity gapu iti pammapatay iti sidong ti kampania kontra droga ti administrasion ni sigud a Presidente Rodrigo Duterte.
Kabayatanna, kinuna ni Presidente Ferdinand Marcos Jr. a ti pannakaaresto ni Duterte ket paset ti obligasion ti Pilipinas iti Interpol, ngem awanen ti plano ti administrasion a makipaset pay iti ICC.
