LA UNION – Nasuspinde iti klase ken trabaho idiay Balaoan, La Union ita nga aldaw ti Miyerkoles, Oktubre 26, kasaruno iti napigsa a magnitude 6.4 a gingined a timmama idiay Tineg, Abra agarop alas 10:59 idi rabii, Oktubre 25, 2022.
Base iti anunsiyo ni Balaoan Mayor Aleli Concepcion, iti inaramid na a suspension ket precautionary measure kadagiti posible nga epekto ti napigsa a gingined kadagiti kangrunaan a pasdek ken imprastruktura, kas kadagiti pagadalan ken opisina ti gobyerno.
Kagiddan daytoy, immandar ti local chief executive kadagiti DPWH engineers ken MDRRMO iti inspection ken damage assesment kadagiti nasao a pasdek ken istruktura.
Kabayatanna, uray iti lokal a gobyerno ti Sudipen ken Bangar ket nasapa a nag-anunsiyo iti suspension of classes iti amin a tukad, iti agpada a public ken private schools.
Base iti Earthquake Information No.3 nga inruar ti PHIVOLCS-DOST, narikna iti Intensity V idiay Bacnotan, Balaoan, Bauang, Caba, San Fernando City, ken Sudipen, La Union bayat nga Intensity IV idiay Bangar, San Juan, ken Santol, La Union
Malaksid iti ili a Balaoan, nagsuspinde met ti klase iti amin a tukad iti ili a Sudipen ken Bangar, La Union.
Segun iti Phivolcs, napasamak ti magnitude 6.4 a gingined agarop alas 10:59 idi rabii manipud iti epicenter idiay Tineg, Abra iti kauneg a 28 a kilometro.