Kinanselaren ti Department of Budget and Management iti PhilGEPS registration dagiti siyam a kompaniya a konektado kenni Cezarah Rowena “Sarah” Discaya kas panangsurot iti pammilin ni Presidente Ferdinand Marcor Junior iti madagdagos a panaka-blacklist dagiti karaman ti maanomalya a flood control projects.
Segun kenni DBM Secretary Amenah Pangandaman, agsagsagana metten iti Procurement Service-DBM nga ikkaten manipud iti listaan dagiti dadduma pay a kompanya kas iti SYMS Contruction Trading ken Wawao Builders, iti kanito a mangiruar ti opisyal a blacklist iti Department of Public Works and Highways.
Maibasar daytoy itiRepublic Act 12009 wenno New Government Procurement Act, a mangbilbilin a dagos nga ikkaten iti PhilGEPS iti siasinoman a nakalista iti blacklist ti ahensia–a mangiparparit kadakuada a makipased iti aniaman a bidding ti gobierno.
Impasigurado met ti PS-DBM ken DPWH nga agtultuloy iti repormada tapno mapagsungbat dagiti korap a kontratista ken maisubli iti panagtalek ti publiko seknan iti panaggastos to gobierno.###
