LA UNION – Naka-status quo ita ti panangaramid ken panangibangon dagiti narugyan nga estraktura idiay Sitio Kompadas iti Barangay Santiago, ili ti Bauang, La Union.
Iti pannakiuman ti Bombo Radyo kenni Santiago Punong Barangay Clarito Tangalin, kinunana a kaipapanan daytoy a temporaryo iti pannakaisardeng iti panangitrabaho ti aniaman a kita iti pasdek ti nasao a lugar.
Sigun iti kapitan, base iti naangay a taripnong dagiti agrekreklamo ken dagiti naduma-duma a sangay ti lokal a gobyerno karaman ti DENR, maipagarup nga awanan iti umno a permiso manipud iti Municipal Engineering Office dagiti maseknan nga agibangbangon kadagiti estraktura gapu ti kinaawan iti proof of ownership.
No man pay nalawlawagan iti sumagmamano nga isyu kuna ni Tangalin, ket saan pay a naresolba maipapan ti klasipikasyon iti nadakamat a lote no daytoy ket maibilang kas public land ken madama a maur-uray iti sungbat ti DENR-Central Office.
