Pinatibker ti Korte Suprema ti bileg ti katulagan a panalakoan ti daga nga awan ti aniaman a kasuratan kasaruno ti desisyon ken panangipaulog ti resolusyon mainaig iti kapada a kaso.
Segun iti desisyon nga insurat ni Associate Justice Samuel H. Gaerlan, pinaboran ti 3rd Division ti Korte Suprema ti verbal sale of land da Marcos Batara ken ti kaanakan na a ni Benedicto Ocampo, nu sadino ket awan ti kontrata wenno kasulatan, ngem kinuna ti korte nga adda latta iti bileg iti panaglako.
Idi natay ti makinkukua ken naglako a ni Batara, nabati latta ti rehistro na iti nagan na, a naudi a naammoan dagiti annak na nga isuda Noblesa ken Ernesto.
Ditoy dan a nakaawat ti notisya a bayadan dagiti saan pay a nabaybayadan a buis iti real estate ken naammoan nga idiay metten nga agnanaed iti kasinsin da a ni Ocampo.
Nangipila dagiti annak iti kaso tapno mababawi iti daga manipud kenni Ocampo, kasaruno ti kinunada nga isuda iti rumbeng nga agmana.
Para met iti biang ni Ocampo, impaganetget na a nagatang na ti daga manipud kenni Batara idi sibibiag pay daitoy ngem awan laeng ti aniaman a nagbalin da a kasuratan.
Maibasar ti desisyon ti Regional Trial Court ken Court of Appeals a nagiggem ti kaso, pinaboran da ti annak nga isuda Noblesa ken Ernesto ngem binaliktad daitoy iti Korte Suprema.
Binigbig ti kangatoan a Korte nga adda paylaeng iti bileg ti panaglakoan ti daga nga uray awan iti nakasurat a kontrata gapwanan da daitoy ket naipatungpalen kas maibasar iti Civil Code of the Philippines.
Kabayatanna, obligado met ni Ocampo a bayadan dagiti nabatbati pay a balanse ti presyo ti panaggatang, karaman dagiti maiyannatop nga interes.
