LA UNION – Naipasidong ti intero a probinsiya ti La Union iti community quarantine kas addang tapno malapdan iti panagwaras ti makapatay a COVID 19.
Daytoy ket maiyannurot iti Executive Order No. 12, series of 2020, nga inyisyu ni Governor Francisco “Pacoy” Ortega III, maibasar iti lalaunen ti Local Government Code, a mangipaay bileg iti maysa a local chief executive tapno kitaen iti pagsayaatan dagiti umili, partikular iti panangsalaknib ti salun-at dagitoy.
Kabuyog ti nasao nga EO iti panangipatungpal ti sumagmamano a panagbal-baliw ken nairut nga allagaden.
Iti PNP, AFP, Prov’l. Health Office, ken PDRRMO iti mangimando ti check points idiay Sudipen, Burgos, Rosario, Sto. Tomas, ken Pugo tapno siguradwen nga awan ti makastrek a dayo ditoy probinsiya bayat a dagiti residente ket limitado iti pagturongan da, malaksid nu emergency.
Immunan a naideklara ti suspensiyon ti klase iti amin a level, suspendido metten ti trabaho kadagiti opisina ti Provincial Gov’t. of La Union (PGLU) malaksid kadagiti mangipapaay ti kaskenan a serbisyo.
Nairikep metten iti amin a tourist destinations agraman dagiti Surf Schools iti nalatak a ‘Surfing Capital of the North’ idiay San Juan, La Union.
Maipatungpal pay ti curfew hours iti intero a probinsiya, manipud alas 10:00 ti rabii agingga alas 5:00 ti agsapa, malaksid kadagiti indibiduwal nga adda iti emergency ken security works.
Iti pannakaipasidong ti La Union iti quarantine ket epektibo ita nga aldaw, March 16 agingga April 12, 2020.
