Naangay ita nga aldaw, Pebrero 21, 2026 ti La Union Agkaysa Jobs Fair 2026, kas paset ti pannakarambak ti maika-176 Founding Anniversary ti Probinsia ti La Union iti maysa a mall idiay Brgy. Biday, Siudad ti San Fernando, La Union.
Nangrugi ti aktibidad iti alas-otso ti bigat aginggana alas-kuatro ti malem.
Ti panaglukat ket indauluan ti Words of Welcome ni Ramon B. Torres, Provincial Administrator, impaganetgetna a ti jobs fair ket napateg a gundaway para kadagiti agsapsapul ti trabaho.
Segun kadagiti organizers, nakipaset dagiti 47 private local employment agencies ken tallo nga overseas employers, karaman ti one-stop shop dagiti ahensia ti gobierno tapno mapapartak iti panagaplikar ken pannakaproseso dagiti dokumento dagiti agsapsapul ti trabaho.
Paset ti aktibidad dagiti naduma-duma a partner agencies kas ti Department of Labor and Employment Region I ken DOLE La Union Field Office, Philippine National Police Recruitment Unit, Technical Education and Skills Development Authority, Overseas Workers Welfare Administration, Departament of Trade and Industry, Departament of Migrant Workers, Civil Service Commission, PhilHealth, Social Security System, Pag-IBIG Fund, National Bureau of Investigation, ken Department of Foreign Affairs, karaman kadagiti dadduma pay nga opisina ti Provincial Government.
Nangited pay ti mensahe da Anne Maureen Tan, President of Philippine Chamber of Commerce and Industry–La Union; Exequiel Ronie A. Guzman, Regional Director – DOLE Regional Office I; Miguel Corleone B. Magsaysay ken Maria Rosario Eufrosina P. Nisce – Sangguniang Panlalawigan Members.
Kabayatanna, pormal nga indeklara ti pannakalukat ti jobs fair babaen kenni Mario Eduardo C. Ortega, Gobernador ti La Union, a nangipeksa iti suporta ti provincial government kadagiti programa a nairanta a mangipaay iti ad-adu pay a gundaway iti trabaho para kadagiti umili ti probinsia.
Panggep ti La Union Agkaysa Jobs Fair 2026 nga iyasideg dagiti agsapsapul iti trabaho kadagiti employers ken mapapartak iti proseso ti employment matching kas paset ti agtultuloy a pannakaitandudo ti lokal a panagdur-as ken pagbiagan iti La Union.###
