Pinapigsa dagiti Corn Coordinator ti La Union iti koordinasion para iti panangipatungpal dagiti programa a makatulong kadagiti mannalon ken industria ti mais.
Daytoy ket babaen ti 3rd Quarterly Meeting cum Workshop nga indauluan ti Office of the Provincial Agriculturist (OPAg) idi Setiembre 9 idiay Agoo Farmers Hall, Agoo, La Union.
Timmabuno dagiti 16 a City ken Municipal Corn Coordinators, OPAg technical staff, dagiti nangibagi ti DA-RFO 1, ken partners manipud iti pribado a sektor.
Natalantan iti third-quarter accomplishments, priority intervention para iti maikapat a kuarter ken inton 2027, kasta met dagiti research proposal para iti corn technology demonstration.
Nangisayangkat met ti technical discussion ni DA-RFO 1 Senior Science Specialist Ruel Ramos maipapan iti proposal preparation ken crop-cut procedure.
Suportado ti pribado a sektor iti province-wide corn technology demonstration babaen dagiti produkto ken teknolohiyada pang-agrikultura.
Agtultuloy iti koordinasion dagiti Corn Coordinator iti gobierno ken dadduma pay nga ahensia para iti panangipatungpal, panagmonitor, ken panagreport dagiti aktibidad para iti industria ti mais.###
