LA UNION – Iyaw-awis ti Provincial Government of La Union (PGLU) babaen iti panangidaulo ni Governor Francisco Emmanuel “Pacoy” Ortega III, kadagiti umili ditoy probinsiya a dumngeg ken agbuya iti maiyuswat a programa a napaulwan iti “Rugian Iti 2021”.
Iti eksklusibo a pannakiuman ti Bombo Radyo La Union kenni Provincial Information and Tourism Officer Adamor Dagang, kinuna na a babaen iti baro a programa ti PGLU, iparang ken ibinsa-binsa ni Gov. Pacoy dagiti programa, addang ken plano ti lokal a gobyerno nga adda pakainaigan na iti Covid 19 vaccination program, panangsalwad iti aglawlaw, maipatungpal nga imprastruktura, ken kinatalged dagiti umili, nga agturong iti mas natitibker a La Union.
Segun kenni Dagang, nakatuding nga ipaganetget ti gobernador dagiti madama ken plano pay a programa tapno malabanan iti pandemya ken agballigi iti recovery program iti laksid ti sangsangwen a parikot iti COVID 19.
Kinuna pay ni Dagang a limitado laeng dagiti dumar-ay iti nasao nga aktibidad tapno mamentenar iti social distancing.
Dagiti laeng board members, 2 nga ushers, ken limitado a production crew, iti personal a dumar-ay bayat a dagiti dadduma a participants ket virtual a makipaset.
Iti “Rugian Iti 2021” ket mangrugi iti oras ti alas 3:00 inton malem, mabuya babaen iti FB page ti PGLU wenno dumngeg iti Bombo Radyo La Union.
