LA UNION – Iti naisayangkat a dialogo ti baetan iti pulisya ken ti La Union Muslim Community, saan met a nailemmeng dagiti sumagmamano a Muslim idiay syudad ti San Fernando, La Union iti panagdanag gapu ti agdama a mapaspasamak a riribok gapuanan ti panangraot iti Maute Terror Group idiay Marawi City.
Sigun kenni Supt. Dennis Rodriguez, hepe ti San Fernando City Police, napateg iti pannakitinnulong dagiti Muslim iti pulisya tapno maipanamnama a saan a makaserrek iti syudad dagiti agtartarigagay a mangisaknap ti kinadamsak kas ti Maute Terror Group.
Aniaman nga impormasyon a maawat iti opisnada kinunana, nga iberipikada ti isyu partikular no adda ti pakainaigan kadagiti taga-Marawi tapno malapdan ti malisyuso a saritaan iti syudad ken tapno saan met a madadael ti reputasyon ti dadduma karunaan iti maysa a Muslim.
Impanamnama met iti pulisya ni La Union Muslim Community President Allan Macapundag, a makitinnulongda kadagiti otoridad gapu ta saanda kayat a maapektaran ti natalna a panagbiagda iti syudad ti San Fernando nga adayo no maikompara iti agdama a kasasaad idiay Marawi City.
