LA UNION – Nasurok a dua ribu a muslim iti intero a La Union iti agu-ummong kadagiti mosque da para iti tinawen a selebrasyon ti Eid al-Adha wenno Feast of the Sacrifice ita nga aldaw ti Lunes, Agosto 12.
Naamwan ti Bombo Radyo La Union kenni La Union Muslim Community Pres. Allan Macapundag, a rinugyan da idi kalman, Agosto 11, iti selebrasyon ti Eid al-Adha babaen iti panagkararag ken panagparti iti ayup kas ti baka ken kalding, a nagbalinen nga aramid dagiti muslim tunggal madanon ti nasao nga islamic festival.
Kinuna na a ti panagparti ti dingwen ket kas pananglagip ken panangsurot iti inaramid a sakripisyo ni Abraham a panangisagut ti bukod na nga anak kenni Allah.
Segun pay kenni Macapundag a linaun ti panagkararag da nga iyadayu ti Pilipinas iti kinaranggas tapno maaddaan ti naulimek ken naurnos a panagbiag dagiti umili iti sadinuman a suli ti Pilipinas.
Ditoy San Fernando City, adda iti nasurok 700 a populasyon dagiti muslim.
Malaksid ditoy syudad, masarakan ti mosque da idiay ili ti Rosario, Agoo, San Gabriel, Bauang ken San Juan.
