LA UNION – Nakailista manen iti nangato a kaso ti COVID 19 iti probinsiya ti La Union, idi Sabado, Oktubre 31, 2020.
Base iti datus nga inruar ti Provincial Government of La Union (PGLU) kas kinumpirma ti Department of Health-Center for Health Development 1 (DOH-CHD1), dumanon iti 21 dagiti baro a kaso ti COVID 19.
Kaadwan a kaso ket naggapo idiay ili ti Agoo nga umabot ti 13; tallo met idiay ili ti Rosario; dua ti ili ti San Juan ken dua met ditoy syudad ti San Fernando; bayat a maysa idiay ili ti Burgos.
Adda ita ti 43 nga active cases manipud iti pakabuklan a kumpirmado a kaso a 472.
Agtaltalinaed met a 413 dagiti recoveries ken 16 dagiti natay gapwanan ti kumplikasyon iti sakit a COVID 19.
Kabayatanna, base iti paka-ammo ti gobyerno syudad ti San Fernando iti facebook page dagitoy, dagiti dua a baro a nailista a kaso ket isuda Patient #213, 25-anyos a lalaki ken kameng ti Philippine Coastguard, nga iti agdama ket naka-isolate iti Coast Guard Station idiay Barangay Poro.
Bayat a ni Patient #214 ket maysa a 35-anyos a lalaki, residente ti Barangay Parian (Zone 4) ken nakaadmit ita iti Ilocos Training and Regional Medical Center (ITRMC).
Siniguro iti PGLU ken LGU-San Fernando nga agtul-tuloy a naka-monitor ken nakabantay iti local IATF kadagiti maipatpatungpal nga allagaden iti pananglaban ti sakit a COVID 19, partikular dagiti minimum public health standards ken dadduma pay a preventive measures.
