LA UNION – Maysa ti Provincial Government of La Union (PGLU) kadagiti LGUs iti intero a Region 1, a nakaiplastar iti vaccination plan na tapno labanan iti Covid 19 pandemic.
Iti panagbetla ni Gov. Francisco Emmanuel ‘Pacoy’ Ortega III idi Martes, kinuna na a mangilatang ti probinsiya iti P139-M para iti vaccination program daytoy a target a maipatungpal agingga tawen 2023.
Manipud iti nasao a kantidad, P96-milyon ti mailatang para iti procurement ti bakuna kontra Covid 19 bayat a P43-milyon para iti panag-hire ti kanayunan a manpower, panagipatakder ti cold storage network, logistics, ken dadduma pay nga equipment a kasapolan.
Mainaig ti daytoy, siniguro ti Gobernador a masurot iti intuding ti Department of Health a prayoridad a mabakunaan ket umabot iti 150,000 nga indibidual ti kabilang iti priority group ditoy La Union.
Maipangruna dagiti health care workers, sumaruno iti dadduma a sektor kas dagiti frontliners, senior citizens ken essential workers.
Kabayatanna, dinakamat pay ni Gov. Pacoy nga innem dagiti nadetermina a vaccination centers ditoy La Union, a pakaibilangan iti Balaoan District Hospital, Bacnotan, Naguilian, Caba, Rosario District Hospitals, ken La Union Medical Center.
