Nakipaset ti La Union Police Provincial Office (LUPPO) iti pannakaisayangkat ti Nationwide Simultaneous Earthquake Drill ita nga aldaw, Hunio 18, 2026, kas paset ti panangpapigsa iti pannakasagana kontra kadagiti didigra.
Segun ken ni Police Major Arcelli Pang-ag, Public Information Officer ti LUPPO, sakbay a naisayangkat ti drill ket nakasaganan dagiti kasapulan para iti “go bag” a naglaon iti agas, danom, flashlight ken dagiti non-perishable foods.
Imbaga ni PMAJ Pang-ag a quarterly a maisaysayangkat ti earthquake drill tapno masanay ken naan-anay ti panagsagana ti tunggal maysa no adda sumangbay a didigra. Inlawlawagna met a masapul a saan nga agpanic, nangruna dagiti adda iti high-rise buildings.
Inpalagip ni PMAJ Pang-ag a masapul a suroten ti “Duck, Cover and Hold” no marikna ti panagdayyeg ti daga. Napateg ti papel ti tunggal maysa, kangrunaan dagiti kapulisan, gapu ta no ammo da ti umiso nga aramiden ket makatulongda iti komunidad iti oras ti emerhensia.
Inpalawagna pay a dakkel ti kaimportansia ti National Earthquake Drill tapno maipasdek iti panunot dagiti tattao ti kinaan-anay ti panagsagana kontra kadagiti natural a didigra.
Innayon pay ni PMAJ Pang-ag a seryosohen ti National Earthquake Drill tapno nakasaganada no dumteng ti didigra, nangruna iti panaggingined. Babaen iti panagsanay, maliklikan ti panagpanic ken pannakariro, ken maammoan dagiti umiso nga aramiden tapno maprotektaran ti biag ken kinatalged ti tunggal maysa.
Kasta pay a palagip para ti kakailian nga agbalin nga adal ti napigsa a panaggingined a napasamak idiay Mindanao. Gapu ta saan nga ammo no kaano a dumteng ti kastoy a pasamak, isu a masapul a nakasagana ken ammo ti tunggal maysa ti umiso nga aramiden. (Bombo Lorielyn Llavore)
