LA UNION – Inlunsad ti La Union Provincial Library iti Reading Caravan idi Setiembre 26 idiay Dulao Integrated School, Aringay, La Union.
Panggep daytoy nga itandudo iti reading culture kadagiti pagadalan, pasayaaten iti kinalaing ken panagawat ti panagbasa, kasta met iti kalikagum a mangpaknang ti bokabularion ken pasayaaten iti kritikal a panagpanpanunot.
Nagbalin a paset iti nasao nga aktibidad dagiti 100 nga agad-adal a buklen dagiti estudiante manipud Grade 1, Grade 7, ken Alternative Learning System (ALS).
Iti panagsarungkar dagiti library personnel, tarigagay da a mailungalong iti library services ken maiyam-ammo iti digital literacy a mangsuporta iti lifetime learning – maysa a panagkumit ni Gobernador Mario Eduardo C. Ortega a mangpapigsa iti panagbasa, panagsurat, ken panangpatanor iti panagayat ti panagbasa kadagiti agtutubo nga agad-adal, kasta met a mangipakaammo kadagiti serbisio ti public library iti espiritu ti La Union: Agkaysa.
