Pinasingkedan ni Senate President Vicente Sotto III a 100% nga agsubli ni Senate President Pro Tempore Ping Lacson kas chairman ti Blue Ribbon Committee nga agim-imbestiga kadagiti maanomalya a flood control projects.
Segun kenkuana, opisial nga agtugaw ni Lacson kas chairman ti Blue Ribbon Committee inton Nobyembre 10, iti panagserrek ti Second Regular Session ti 20th Congress.
Nagsarita da idi kallabes maipanggep iti posible a panagsublina iti komite gapo iti “unfinished business” kadagiti narugian nga imbestigasion.
Saan met a mapnek ni Lacson iti taray ti imbestigasion, isu nga agsubli isuna kas chairman ti komite.
Naidiaya iti nasao a posision kadagiti dadduma a miembro ti mayorya, ngem awan kadakuada iti desidido nga idauluan iti Blue Ribbon Committee.
Impasigurado ti Senate President a nakasagana da a sanguen iti aniaman a consequences ti panagsubli ni Lacson.###
