Kinontra ni Senador Panfilo “Ping” Lacson iti kenuna ni Department of Public Works and Highways Secretary Vince Dizon nga awan ti ghost wenno non-existent projects idiay Taguig City, maibasar iti agdama nga imbestigasion ti ahensia.
Iti Senate Finance Subcommittee hearing idi Setiembre 25, kenuna ni Dizon nga awan pay ti nakitada a ghost projects iti siudad, idinto nga impadamag ni DPWH Undersecretary Ricardo Bernabe III a 107 a proyekto idiay Taguig iti addaan ti nairekord nga accomplishment.
Segun kenni Lacson, maikontra daytoy kadagiti sumagmamano a site inspection report ti DPWH no sadino nga adda dagiti flood control ken slope protection projects a naideklara a kompleto ngem saan a navalidate dagiti inspection teams iti pisikal a kaadda ti sumagmamano kadagitoy.
Dinakamatna pay dagiti rekord ken dadduma pay a dokumento a naisubmitir iti opisinana, ken kinunana a naipatuloden ti kampona iti Office of the Ombudsman dagiti ebidensia a mainaig kadagiti maipagarup nga iregularidad para iti fact-finding investigation.###
