Sinublian ni Senador Panfilo “Ping” Lacson kadagiti immun-una nga akusasion a naipabasol kenkuana kabayatan ti administrasion ni sigud a Presidente Gloria Macapagal-Arroyo, kagiddan ti agtultuloy a saan da a panagkinnaawatan ken sigud a Senate President Alan Peter Cayetano.
Iti maysa a statement, kenuna ni Lacson a napaneknekan nga awan ti basaran dagiti immun-una nga alegasion a nakaurnong isuna ti kinabaknang manipud iti illegal a droga ken nangilemmeng ti kuarta kadagiti ganggannaet a banko.
Segun iti senador, idi agangay ket inbabawi dagiti sumangmamano kadagiti kangrunaan a nangakusar kenkuaa, karaman iti pimmusay a sigud nga Intelligence Service of the Armed Forces of the Philippines (ISAFP) Chief Brig. Gen. Victor Corpus ken Angelo “Ador” Mawanay, dagiti alegasionda ken nagkiddaw ti dispensar.
Kenuna pay ni Lacson a binigbig ni sigud a Presidente Arroyo a dagiti immun-una a pammabasol kenkuana ket naibasar iti biddut nga impormasyon.
Inpaganetget ti senador nga iti integridad ti kapatgan a naipatawid kenkuana manipud kadagiti dadakkel daytoy.
Ti nasao nga statement ket kalpasan nga inbaga ni Lacson nga adda dagiti impormer ken testigo a makunkuna a nakasagana a mangted ti ebidensia kontra kenni Cayetano kalpasan a makuestion daytoy iti isyu ti SALN.
Nagramut iti riri kalpasan a kinarit ni Cayetano iti administrasion nga imbestigaran iti 2019 Southeast Asian Games, idinto nga inbaga met ni Lacson a nakasagana isuna a mangisayangkat ti heariing iti maipagarup nga anomalia kadagiti flood control projects.###
