LA UNION – Inwarasen ti pulisya iti naduma-duma a lugar ken ti social media ti larawan ti lalaki a maatap a nanggoldap iti uneg ti LBC Money Remittance outlet idiay Barangay Pagdaraoan, syudad ti San Fernando, La Union.
Sigun kenni Supt. Dennis Rodriguez, hepe ti San Fernando City Police Office, natukoyda ti ‘person of interest’ base iti video a naala ti CCVT camera manipud kadagiti kabangibang a pasdek a kaarruba ti nasao a money remittance outlet.
Base iti CCTV footage, mabuya a sakbay a simrek iti uneg ti nasao a pasdek ti lalaki a nakakawes ti nalabaga a jacket, nakapantalon iti agmaris ti nangisit, ken naka-bag pack ti nangisit ket agpalpaliw pay daytoy iti aglawlaw.
Iti a makakita iti nasayaat a gundaway ti maatap a holdaper ket nagisuot daytoy iti face mask ken sinerrekna ti money remittance outlet kasaruno iti panangala ti P10,000 cash.
Mabuya met iti nasao a video a napartak a naglibas ti nasao a lalaki manipud ti lugar.
Agpanpanawagan ni Rodriguez iti publiko ti pannakitinnulong iti pulisya babaen ti panangipaay ti impormasyon iti paglemlemengan ti maatap a holdaper tapno mapagsungbat daytoy iti linteg.
Immuna iti daytoy, kaluklukat laeng ti empleyado ti nasao nga outlet agarup alas-6:50 ti bigat iti Sept. 2, 2017 idi a killaat a simrek ti saan pay a nabigbig a suspek.
Maipagarup a binutbuteng ti suspek ti empleyado kasaruno iti panangitaray ti P10,000 cash a nakadulin iti maysa a drawer. (Abs Flores)
