Mapagsasaritaan ita ti inaramid a panagtulong ti maysa a policewoman iti panagpasngay ti maysa a misis idiay Barangay Butubot Este, ili ti Balaoan, La Union.
Ti nasao a pulis ket ni PCpl. Rachelle Beverlyn Ramos a nakadistino iti kwepo ti pulisya idiay ili ti Bangar.
Iti pannakiuman ti Bombo Radyo kenni Ramos, kinunana a madama iti panagrubuat daytoy nga ag-duty idiay Bangar Police Station idi nga gumawgawawa iti tulong ti kaarrubana a ni Eugene Reyes gapu ta aganaken ti misis daytoy.
Saan nga nagpangaddua ni Ramos a timmulong isu nga intantanna iti oras a panagturongna ti police station gapu ta awan ti midwife a mangpaanak ti nasao a misis.
Nakasangpetanda laengen a nakaanaken ti misis ken saan pay a naikkat ti umbilical cord wenno ti kadkaddua manipud ti kaipaspasngay a maladaga.
Gapu ta awan pay ti alikamen a pang-medical, nangaramid iti remedyo ni Ramos tapno maisina ti kadkaddua.
Linamawen wenno in-esterilized-na ti kartib ken sinulid sakbayna nga inawamat daytoy a nangputed iti umbilical cord sakbayda a nagturong iti ospital.
Iti agdama, agpada a nasayaaten ti kasasaad dagiti nasao nga agina.
Ni Ramos ket nagturpos iti nursing ken isuna ti maysa kadagiti pagkamkamangan iti kaarrubada maipapan iti saritaan pangsalun-at.
