Nangrugi iti implementasion ti Lakbay Alalay ti Department of Public Works and Highways (DPWH) tapno mangted tulong kadagiti motorista iti daytoy a panawen ti Semana Santa.
Panggep ti programa a mangted tulong kadagiti biyahero iti kalsada, lalo kadagiti saan a makaammo ti pagturonganda wenno agdamag ti direksion, ken kasta met kadagiti makapadas ti aberya kas iti panagkadadael ti lugan. Dagiti personnel ti DPWH a nakabantay iti kalsada iti mangted ti tulong kadakuada.
Segun iti DPWH, naipuesto dagiti personnelda kadagiti kangrunaan a kalsada tapno dagus a makatulong kadagiti motorista a masapul ti tulong ken panangiturong iti pagturonganda.
Nangrugi ti operasion ti Lakbay Alalay idi Abril 1, 2026, ken agtultuloy agingga ita nga aldaw Abril 4, Sabado de Gloria.
Daytoy ket maipatpatumpal iti 24 oras, ken dagiti personnel a naka-deploy ket adda iti tallo a shifts: manipud alas-7 ti bigat agingga alas-3 ti malem, alas-3 ti malem agingga alas-11 ti rabii, ken alas-11 ti rabii agingga alas-7 ti bigat.
Katinnulong met ti DPWH iti panangipatumpal ti programa dagiti personnel ti Bureau of Fire Protection (BFP) ken Philippine National Police (PNP) tapno masigurado iti napartak a panangted ti tulong ken seguridad kadagiti motorista ken biyahero iti kalsada.
Kabayatanna, pinalagipan ti DPWH iti publiko nga agtalinaed a naannad iti panagbiyahe, agbalin a naalerto iti kalsada, ken siguradoen a naimbag iti kondision dagiti lugan tapno maliklikan dagiti aksidente iti panagbiyahe iti daytoy a Semana Santa.
