LA UNION – Babaen iti Facebook Page ti Bombo Radyo La Union, nabirokan iti maysa a pamilya manipud Barangay San Fermin, Caba, La Union iti mapukpukaw a miyembro ti pamilya da, ni Marvin Garcia, a naisina kadakuada iti lima a tawen.
Immuna ti daytoy, nagbalin a walang ni Marvin Garcia gaputi saan a nasimbeng a panunot, ket manipud ili a Caba, naisar-ong agingga idiay probinsiya ti Tarlac.
Nagasat ni Garcia agsipudta maysa a vlogger ken rider a ni Alvin Quirino, residente ti Barangay San Juan, Concepcion, Tarlac iti nakakita ken nangkupkop kenkuana.
Saan nga agsasao ni Garcia ngem idi agbayag a kasarsarita daytoy ni Alvin ket naibaga na met laeng ti nagan na a Marvin Garcia.
Sakbay iti facebook post ti Bombo Radyo La Union, nagtinnulong wenno naaddaan ti koordinasyon iti CPRC Concerned People Riders Club idiay Tarlac ken La Union Chapters, ket indanon met ti rider a ni Jayson “Jepoy” Ocampo kenni Bombo Jerry Vhal iti istorya ni Mang Marvin.
Ket idi mai-post iti FB page ti Bombo Radyo La Union dagiti ladawan ni Marvin Garcia, dagus a dimmanon ti impormasyon iti maseknan a pamilya.
Nagtignay a dagus iti pamilya ni Garcia ket sinukon da daytoy idiay Tarlac.
Iti agdama, nakasublin iti sidong ti pamilya na ni Marvin Garcia idiay San Fermin, Caba, La Union.
Napalaos iti panagyaman ti pamilya kenni Alvin Quirino ken iti pamilya daytoy, a nangipamatmat iti asi ken panagayat iti tao, nga uray saan da a cabagyan ken am-ammo.
