Maysa a 44-anyos a lalaki iti naarestar idiay Barangay Kias, Baguio City idi Hulyo 12 kalpasan a natiliwan nga agparparti ti aso, segun ti Baguio City Police Station 4.
Sumangsango ti suspek ti tallo a nagsisina a kaso gapu iti panaglabsing ti Republic Act No. 8485 wenno Animal Welfare Act of 1998, nga inamendaran ti Republic Act No. 10631.
Segun iti pulisya, rimmusponde dagiti otoridad kalpasan a makaawat ti report seknan iti maipagarup a panagparti ti aso iti lugar.
Naipasidong iti kustodiya ti suspek bayat a maisaysayangkat iti maitutop nga imbestigasion.
Kabayatanna, uppat a kabaruan a criminal complaint iti naipila kontra iti makinbagi ti maysa a restaurant idiay La Trinidad, Benguet kalpasan a napasingkedan ti National Meat Inspection Service (NMIS) a positibo iti dog DNA iti maysa a food sample a nagatang manipud iti nasao nga establishimento.
Maibasar ti laboratory examination ti NMIS, naglaon ti DNA ti aso iti naammiris a taraon.
Segun kenni animal welfare advocate Atty. Amadeo Degay, daytoyen iti maikadua a kumpirmado nga insidente nga adda pakainaiganna iti taraon a maipagarup nga indasar ti maysa a restaurant nga addaan ti kapada a nagan idiay La Trinidad.
Kenuna ni Degay a sumagmamano nga empleyado ti gobierno iti maipagarup a gimmatang ti dua a servings ti mapapati a karne ti aso, nga idi agangay ket naipasidong iti panagammiris ti NMIS ken nagpositibo iti DNA ti aso.
Awan pay ti inrurua nga opisial a waragawag iti makinbagi ti restaurant maipapan dagiti alegasion.
Inpaganetget met ni Degay a nupay adda dagiti exceptions iti sidong ti Animal Welfare Act para kadagiti sumagmamano a mabigbigbig a kultura wenno ritual, saan daytoy a mabalin nga aramiden a basaran iti panangparti ken panangilako ti karne ti aso kas maysa a negosyo.###
