BR LA UNION – Nabagsol iti tiyan ti maysa a lalaki bayat ti panaginom da ti suspek, asideg iti maysa nga store idiay Barangay Poblacion West, Pugo, La Union.
Napasamak ti insidente agarop alas 12:45 ti parbangon idi Lunes, Disyembre 8, 2025.
Ti biktima ket managan Jimmy, agtawen ti 37, addaan asawa, residente ti Sitio Pacay, Tabaan Norte, Tuba, Benguet.
Ti suspek ket nabigbig iti alyas TUKALA, baro, adda ti umno nga edad ken residente ti Barangay Poblacion West, Pugo, La Union.
Maibasar iti report ti Pugo Police Station, naginom dagiti dua idi maipagarop a timpuar ti panagsinnungbat wenno panagriri da bayat nga agpadan dagitoy nga adda iti impluwensiya ti nasanger.
Naiturong ti biktima idiay La Union Medical Center idiay Agoo, La Union babaen kadagiti kameng ti Rural Health Unit (RHU)-Pugo para iti naan-anay a pannaka-agas na.
Naglibas ti suspek kalpasan ti insidente ngem babaen ti hot pursuit operation nga insayangkat ti Pugo Police Station, natiliw da ti suspek iti kabantayan idiay Barangay Tavora East, Pugo La Union idi malem kalman, Disyembre 8.
Ti suspek kalpasan a naipasidong iti medico-legal examination ket dagus a nai-turnover iti police station para iti imbestigasyon ken umno a disposisyon.
