LA UNION – Arestado iti maysa a lalaki kalpasan a ginandat na ti agipuslit ti nasurok 100 nga uleg idiay mainland China.
Inlemmeng ti suspek dagiti uleg iti uneg ti pantalon na, ngem nasita dagiti customs officers idiay Shenzhen.
Napasamak ti insidente idiay Futian Port kabayatan ti checkpoint iti baetan ti Hong Kong ken mainland China.
Iti imbestigasyon dagiti otoridad, nakita da iti innem a canvas drawstring bags a selyado ti tape a nakakabil iti bulsa ti pantalon ti uspek.
Pakabuklan a 104 a naduma-duma a klase ken kolor dagiti nasao nga uleg.
Sumagmamano kadagitoy ket milk snake, western hognose snake, corn snake, Texas rat snake ken bullsnake.
Idi napalabas a bulan, maysa manen a lalaki iti naaresto idi gandatenna nga ipuslit ti 454 nga endangered pawikan manipud Macau agturong idiay mainland China.
